പ്രണയത്തിൽ നിന്നും പിന്മാറി, പെൺകുട്ടിയുടെ വ്യാജ നഗ്നചിത്രങ്ങള്‍ സമൂഹമാധ്യമങ്ങളിൽ പ്രചരിപ്പിച്ചു; വയനാട്ടിൽ യുവാവ് അറസ്റ്റില്‍
വയനാട്: കാമുകി പ്രണയത്തില്‍ നിന്നും പിന്മാറിയതിനെ തുടർന്നുണ്ടായ വൈരാഗ്യത്തിൽ കാമുകിയുടെ മോർഫ് ചെയ്ത നഗ്നചിത്രങ്ങള്‍ സമൂഹ മാധ്യമങ്ങളിലൂടെ പ്രചരിപ്പിച്ച സംഭവത്തിൽ യുവാവ് അറസ്റ്റില്‍. തവലോട്ടുകോണം സ്വദേശി അനന്തു (21) ആണ് പോലീസിന്റെ പിടിയിലായത്. സോഷ്യല്‍ മീഡിയയിലൂടെ പരിചയപ്പെട്ട യുവതിയുമായി അനന്തു പ്രണയത്തിലാക്കുകയായിരുന്നു. എന്നാൽ പിന്നീട് ഇരുവരും തമ്മില്‍ തര്‍ക്കങ്ങള്‍ ഉണ്ടാകുകയും ഇതോടെ ഇരുവരും തമ്മിലുള്ള ബന്ധം വഷളാവുകയായിരുന്നു. ഇതോടെ യുവതി ബന്ധത്തില്‍ നിന്നും പിന്മാറാന്‍ തീരുമാനിക്കുകയായിരുന്നു. ഇതിൽ പ്രകോപിതനായാണ് യുവാവ് പെൺകുട്ടിയുടെ വ്യാജ നഗ്നചിത്രങ്ങൾ പ്രചരിപ്പിച്ചത്. സംഭവത്തില്‍ യുവാവിന്‍റെ ലാപ്ടോപ്പ്, മൊബെല്‍ ഫോണ്‍ എന്നിവയും പോലീസ് കസ്റ്റഡിയിലെടുത്തിരിക്കുകയാണ്. ഐടി നിയമത്തിലെയും ഇന്ത്യന്‍ ശിക്ഷാ നിയമത്തിലെയും വിവിധ വകുപ്പുകള്‍ പ്രകാരമാണ് അനന്തുവിനെതിരെ കേസ് രജിസ്റ്റര്‍ ചെയ്തിരിക്കുന്നത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
