കല്ലുവാതുക്കലിൽ നവജാതശിശു മരിച്ച സംഭവം; സംശയമുള്ളവരുടെ ഡി എൻ എ പരിശോധന നടത്തും
Jan 19, 2021, 11:18 IST
കൊല്ലം: കല്ലുവാതുക്കളിൽ കരിയിലക്കൂട്ടത്തിൽ ഉപേക്ഷിച്ച നവജാത ശിശു മരിച്ച സംഭവത്തിൽ ഡി എൻ എ പരിശോധന നടത്തും. സംശയിക്കുന്ന പ്രദേശവാസികളായ എട്ട് പേരുടെ ഡി എൻ എ പരിശോധന നടത്താനാണ് അന്വേഷണസംഘം തയ്യാറെടുക്കുന്നത്.കഴിഞ്ഞ പതിമൂന്ന് ദിവസമായി കുഞ്ഞിന്റെ മൃതദേഹം മോർച്ചറിയിൽ സൂക്ഷിച്ചിരിക്കുകയാണ്. ജനുവരി അഞ്ചിനാണ് ഊഴായ്ക്കോട് ക്ഷേത്രത്തിനു സമീപമുള്ള മഠത്തിൽകുന്നിലെ ഒരു വീടിന് പിന്നിലെ പറമ്പിൽ നിന്നു ആൺകുട്ടിയെ കണ്ടെത്തിയത്. സംഭവത്തിൽ നരഹത്യയ്ക്കാണ് പൊലീസ് കേസ് രജിസ്റ്റർ ചെയ്തിരിക്കുന്നത്.