ചൈനയിൽ ഐസ്ക്രീമിൽ കൊറോണ വൈറസ് ; 2,089 ബോക്സ് ഐസ്ക്രീമുകൾ നശിപ്പിച്ചു, 1600 ജീവനക്കാരെ ക്വാറന്‍റീനിലാക്കി, ഐസ്ക്രീം വാങ്ങിയവരെ കണ്ടെത്താനും ശ്രമം
ബീജിങ്: ലോകത്തെ ദുരിതത്തിലാഴ്ത്തിയ കൊറോണ വൈറസിന്റെ പ്രഭവ കേന്ദ്രമായ ചൈനയിൽ നിന്നും മറ്റൊരു ഞെട്ടിക്കുന്ന റിപ്പോർട്ട് കൂടി പുറത്ത്. ചൈനയിൽ ഐസ്ക്രീമിൽ കൊറോണ വൈറസ് സാന്നിധ്യം കണ്ടെത്തിയതായാണ് ആശങ്കപ്പെടുത്തുന്ന റിപ്പോർട്ട്. വടക്കൻ ടിൻജിൻ പ്രവശ്യയിലാണ് സംഭവം. ടിൻജിൻ ദാക്കിയോഡോ ഫുഡ് കമ്പനി നിർമിച്ച ഐസ്ക്രീമിലാണ് കൊറോണ വൈറസ് സാന്നിധ്യം കണ്ടെത്തിയതെന്ന് ചൈനീസ് മാധ്യമങ്ങളെ ഉദ്ധരിച്ചു ഹിന്ദുസ്ഥാൻ ടൈംസ് റിപ്പോർട്ട് ചെയ്യുന്നു. വൈറസ് കണ്ടെത്തിയതിനെ തുടർന്ന് 2,089 ബോക്സ് ഐസ്ക്രീമുകൾ കമ്പനി നശിപ്പിച്ചു. 4,836 ബോക്സുകൾ അധികൃതർ പിടിച്ചെടുത്തിട്ടുണ്ട്. ഐസ്ക്രീം വാങ്ങിയവരെ കണ്ടെത്താനുള്ള ശ്രമങ്ങൾ തുടങ്ങിയതായി ആരോഗ്യവകുപ്പ് അധികൃതർ അറിയിച്ചു. മുന്കരുതലെന്നോണം ഐസ്ക്രീം കമ്പനിയിലെ 1600 ജീവനക്കാരെ ക്വാറന്‍റീനിലാക്കിയിട്ടുണ്ട്. ഇവരെ കോവിഡ് ടെസ്റ്റിനും വിധേയമാക്കി. ഇതിൽ 700 പേരുടെ പരിശോധന ഫലം നെഗറ്റീവാണ്. ഐസ്ക്രീമിൽ കൊറോണ വൈറസിന് കൂടുതൽ സമയം നില നിൽക്കാൻ കഴിയുമെന്നാണ് സൂചന. കോവിഡ് ബാധിച്ച ആരിൽ നിന്നെങ്കിലുമാവും വൈറസ് ഐസ്ക്രീമിലെത്തിയതെന്നാണ് നിഗമനം. ഞായറാഴ്ച ചൈനയിൽ 109 പേർക്ക് കൂടി കോവിഡ് സ്ഥിരീകരിച്ചിരുന്നു.
