മാരുതി ബലേനോ ആൽഫ ഓട്ടൊമാറ്റിക് അവതരിപ്പിച്ചു
ന്യൂഡൽഹി: വിപണിയില് തരംഗമായി കുതിക്കുന്ന പ്രീമിയം ഹാച്ച്ബാക് ബലേനോയ്ക്ക് പുതിയ ഓട്ടൊമാറ്റിക് വകഭേദവുമായി മാരുതി സുസുക്കി. കണ്ടിന്യുവസ് വേരിയബിള് ട്രാന്സ്മിഷനോട് (CVT) കൂടിയാണ് ഈ ടോപ് വേരിയന്റ് വിപണിയിലേക്കെത്തുന്നത്. നേരത്തെ ഡെല്റ്റ, സീറ്റ വകഭേദങ്ങളിലാണ് ബലേനോയ്ക്ക് ഓട്ടൊമാറ്റിക്കുണ്ടായിരുന്നത്. അതുകൂടാതെയാണ് ടോപ് വേരിയന്റായ 1.2 ലിറ്റര് ആല്ഫ പെട്രോള് ഓട്ടൊമാറ്റിക് അവതരിപ്പിച്ചിരിക്കുന്നത്. 8.34 ലക്ഷം രൂപയാണ് ആല്ഫ ഓട്ടോമാറ്റിക്കിന്റെ ന്യൂഡല്ഹി എക്സ്ഷോറൂം വില.
എല്ഇഡി ഡേടൈം റണ്ണിങ് ലൈറ്റുകള്, പ്രൊജക്റ്റര് ഹെഡ്ലാംപുകള്, റിവേഴ്സ് പാര്ക്കിങ് ക്യാമറ, ആപ്പിള് കാര്പ്ലേ, മിറര്ലിങ്ക് കണക്റ്റിവിറ്റിയുള്ള സ്മാര്ട്ട്പ്ലേ ഇന്ഫോടെയ്ന്മെന്റ് സിസ്റ്റം എന്നിങ്ങനെയുള്ള ഫീച്ചറുകള് ഈ ഹാച്ചില് ഉള്പ്പെടുത്തിയിട്ടുണ്ട്.
2015 ഒക്റ്റോബറില് അരങ്ങേറ്റം കുറിച്ചതു മുതല് തകര്പ്പന് വില്പ്പന കൈവരിച്ചാണു ബലേനോയുടെ മുന്നേറ്റം. ഏതാനും മാസം മുമ്പ് വിപണിയിലെത്തിയ, ഒരു ലിറ്റര് ബൂസ്റ്റര് ജെറ്റ് എന്ജിനുള്ള സ്പോര്ട്ടി പതിപ്പായ ബലേനോ ആര് എസിന്റെ വില്പ്പന കണക്കിലെടുക്കാതെയാണ് മാരുതി സുസുക്കി ഈ തകര്പ്പന് നേട്ടം സ്വന്തമാക്കിയത്.
27 കിലോമീറ്ററാണ് ബലെനോ ആല്ഫ ഡീസലിന് മാരുതി സുസുക്കി വാഗ്ദാനം ചെയ്യുന്ന ഇന്ധനക്ഷമത. പെട്രോള്, ഡീസല് എന്ജിനുകളോടെയാണ് നിലവിലെ ബലേനോ വില്പനയ്ക്കുള്ളത്.
1.2 ലിറ്റര്, വി വി ടി പെട്രോള്, 1.3 ലിറ്റര്, ഡി ഡി ഐ എസ് ഡീസല് എന്ജിനുകളാണു കാറിന് കരുത്തേകുന്നത്. സ്വിഫ്റ്റിലെ പെട്രോള് എന്ജിന്റെ ട്യൂണിങ് പരിഷ്കരിച്ചു ബലേനോയിലെത്തുമ്പോള് പരമാവധി 83 ബിഎച്ച്പി കരുത്തും 115 എന്എം ടോര്ക്കുമാണു സൃഷ്ടിക്കുന്നത്. പലതവണ മികവു തെളിയിച്ച 1.3 ലിറ്റര് ഡീസല് എന്ജിനാവട്ടെ പരമാവധി 74 ബിഎച്ച്പി കരുത്തും 190 എന്എം ടോര്ക്കുമാണു സൃഷ്ടിക്കുക. പെട്രോള് വകഭേദത്തില് മാത്രമാണ് ഓട്ടൊമാറ്റിക് ഗിയര്ബോക്സുള്ളത്. ഡീസല് എന്ജിനു കൂട്ട് മാനുവല് ഗിയര്ബോക്സ് മാത്രമായിരിക്കും. ഇപ്പോൾ നൂറിലേറെ രാജ്യങ്ങളിലേക്ക് ബലേനോ കയറ്റുമതി ചെയ്യുന്നുണ്ട്. ജപ്പാനിലേക്ക് കയറ്റുമതി ചെയ്യുന്ന മാരുതി സുസുക്കിയുടെ ആദ്യ കാറാണ് ബലേനോ.