ചൈൽഡ് പ്രൊട്ടക്ഷൻ ഓഫിസർ ചമഞ്ഞ് തട്ടിപ്പ്; 23 കാരൻ അറസ്റ്റിൽ
വാഴക്കാട്: ശിശുസംരക്ഷണ ഉദ്യോഗസ്ഥൻ ചമഞ്ഞ് തട്ടിപ്പ് നടത്തിയ കേസിൽ ഇരുപത്തിമൂന്നുകാരൻ അറസ്റ്റിൽ. മൊറയൂർ ചൂരൻതൊടി നിജാസിനെ (23) ആണ് വാഴക്കാട് പൊലീസ് അറസ്റ്റ് ചെയ്തത്. കഴിഞ്ഞ ഒക്ടോബറിലാണ് കേസിനാസ്പദമായ സംഭവം. ചൈൽഡ് പ്രൊട്ടക്ഷൻ യൂനിറ്റിലെ ഉദ്യോഗസ്ഥനെന്ന് ധരിപ്പിച്ച് വാഴക്കാട്ടെ മലബാർ ഹോളോബ്രിക്സ് ആൻഡ് ഇൻറർ ലോക്ക്, പുതുക്കോട് ഭാരത് ഹോളോബ്രിക്സ് എന്നീ സ്ഥാപനങ്ങളിൽനിന്ന് ഒരു ലക്ഷം രൂപയുടെ സാധനങ്ങളാണ് ഇയാൾ കൈപ്പറ്റിയത്.തുടർന്ന് വാഴക്കാട്ടെ മലബാർ ഹോളോബ്രിക്സ് ഉടമ നൽകിയ പരാതിയിലാണ് അന്വേഷണമാരംഭിച്ചത്.ഇൻസ്പെക്ടർ കുഞ്ഞിമൊയിൻ കുട്ടിയുടെ നേതൃത്വത്തിൽ എസ്.ഐ സുബീഷ് മോൻ, എ.എസ്.ഐ കൃഷ്ണദാസ്, സി.പി.ഒമാരായ അബ്ദുല്ലക്കോയ, ബാബുരാജ്, മൻസൂർ, വിജേഷ്, മിനി, ബാഗേഷ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.
