സിന്തറ്റിക് മയക്കുമരുന്നുമായി യുവാവ് പിടിയിൽ
തൃശൂർ: സിന്തറ്റിക് മയക്കുമരുന്നുകളുമായി യുവാവ് പിടിയിൽ. വെങ്കിടങ്ങ് ഏനാമാക്കൽ പുതിയവീട്ടിൽ അഫ്സലിനെയാണ് (28) വിവിധയിനം സിന്തറ്റിക് മയക്കുമരുന്നുകളുമായി എക്സൈസ് സ്പെഷൽ സ്ക്വാഡ് അറസ്റ്റ് ചെയ്തത്. ഇയാളിൽനിന്ന് 40 എം.ഡി.എം.എ എക്സ്റ്റസി ടാബ്ലെറ്റും 17 എൽ.എസ്.ഡി സ്റ്റാമ്പും ഒരു ഗ്രാം ക്രിസ്റ്റലും കഞ്ചാവും പിടിച്ചെടുത്തു. ഡെപ്യൂട്ടി എക്സൈസ് കമീഷണർ കെ. പ്രദീപ് കുമാറിന് ലഭിച്ച വിവരത്തെ തുടർന്നാണ് പരിശോധന നടത്തിയത്. പരാതിയിൽ നിന്നും ലഹരികടത്തിന് ഉപയോഗിച്ച കാറും പിടിച്ചെടുത്തു. റെയ്ഡിന് എക്സൈസ് ഇൻസ്പെക്ടർ ജി. കൃഷ്ണകുമാർ, അസി. എക്സൈസ് ഇൻസ്പെക്ടർ ജീൻ സൈമൺ, പ്രിവൻറിവ് ഓഫിസർ ടി.എസ്. സുരേഷ് കുമാർ, ഉദ്യോഗസ്ഥരായ ഡിക്സൻ, ശശികുമാർ, സന്തോഷ്, അനിഷ്, അബ്ദുൽ റഫീഖ്, രഞ്ജിത്ത്, സന്തോഷ്, ഷിബു എന്നിവർ പങ്കെടുത്തു.