ലോകകപ്പ് ക്രിക്കറ്റിന്‍റെ കമന്‍റേറ്റർമാരുടെ പട്ടികയിലെ പെൺസ്വരങ്ങൾ..!
ലോകകപ്പ് ക്രിക്കറ്റിന്‍റെ കമന്‍റേറ്റർമാരുടെ പട്ടിക കഴിഞ്ഞ ദിവസമാണ് ഐസിസി പുറത്തുവിട്ടത്. 24 അംഗ പട്ടികയിൽ മൂന്നു വനിതകളും ഇടംപിടിച്ചു.
ഇവരാണ് ലോകകപ്പ് ക്രിക്കറ്റിലെ പെൺസ്വരങ്ങളാകുന്ന മൂന്നു പേർ
ഇസ ഗുഹ (ഇംഗ്ലണ്ട്)
2009 ലോകകപ്പ് ജയിച്ച ഇംഗ്ലിഷ് വനിത ടീമംഗം. മീഡിയം പേസറായ ഇസ 2001ൽ, പതിനാറാം വയസിലാണ് അരങ്ങേറിയത്. 2012ൽ ക്രിക്കറ്റ് കളത്തോട് വിടപറഞ്ഞു. തുടർന്ന് ടെലിവിഷൻ സംപ്രേക്ഷണ രംഗത്തേക്ക് തിരിഞ്ഞ ഇസ വിവിധ കായിക പരിപാടികളുടെ അവതാരകയായി. സ്കൈ സ്പോർട്സിന്‍റെയും ഐടിവിയുടെയും റേഡിയോകളിലും പ്രവർത്തിച്ചു. ബിബിസിയുടെ ക്രിക്കറ്റ് ദൂസരയുടെയും അവതാരകയായിരുന്നു.
അലിസൺ മിച്ചൽ (ഇംഗ്ലണ്ട്)
പ്രൊഫഷണൽ ക്രിക്കറ്റ് താരമല്ല മിച്ചൽ. ഹോക്കി താരമെന്ന നിലയിലാണ് അവർ അറിയപ്പെട്ടത്. കായിക പ്രക്ഷേപണ രംഗത്തെ പരിചയസമ്പന്ന. ബിബിസി റേഡിയോയിലൂടെ കരിയറിന് തുടക്കമിട്ടു. ബിബിസിയുടെ ടെസ്റ്റ് മാച്ച് സ്പെഷലിൽ കമന്‍റേറ്ററാകുന്ന ആദ്യ വനിതയെന്ന പെരുമയും സ്വന്തം. പുരുഷ ക്രിക്കറ്റ് കവർ ചെയ്യുന്ന ആദ്യ വനിതയും മിച്ചൽ തന്നെ. ചാനൽ 4, ചാനൽ 7, ഇഎസ്പിഎൻ സ്റ്റാർ സ്പോർട്സ്, സ്കൈ, ബിടി സ്പോർട്സ് എന്നിവയുടെയും ഭാഗമായിരുന്നു.
മെൽ ജോൺസ് (ഓസ്ട്രേലിയ)
മുൻ ഓസ്ട്രേലിയൻ ടീമംഗം. ഓസിസ് വനിത ടീമിനുവേണ്ടി 61 ഏകദിനങ്ങളം അഞ്ച് ടെസ്റ്റ് മത്സരങ്ങളും കളിച്ച ജോൺസ് 2007ലാണ് കമന്‍ററിയിലേക്ക് തിരിഞ്ഞത്. സ്പോർട്സ് റിപ്പോർട്ടർ എന്ന നിലയിൽ ഓസ്ട്രേലിയയിലെ ചാനൽ 9 എബിസി റേഡിയോ എന്നിവയിൽ സേവനമനുഷ്ഠിച്ചു. ഐപിഎൽ, ബിഗ് ബാഷ്, പാക്കിസ്ഥാൻ പ്രീമിയർ ലീഗ് എന്നിവയുടെ കാണികൾക്ക് ജോൺസിനെ ശബ്ദം സുപരിചിതം.