കോവിഡ് മുക്തരായ ആരോഗ്യപ്രവർത്തകർക്ക് വീണ്ടും രോഗബാധ സ്ഥിരീകരിച്ചു; ആശങ്കയിൽ രാജ്യം
ഡൽഹി: കൊവിഡ് മുക്തരായ ആരോഗ്യപ്രവർത്തകർക്ക് വീണ്ടും വൈറസ് രോഗബാധ കണ്ടെത്തിയാതായി റിപ്പോർട്ട്. നോയിഡ ആശുപത്രിയിലെ ആരോഗ്യ പ്രവർത്തകർക്കാണ് രോഗ ബാധ കണ്ടെത്തിയത്. എന്നാൽ അപൂർവമായി ഉണ്ടാകുന്ന സംഭവം മാത്രമാണിതെന്നാണ് ഐസിഎംആറിന്റെ വിലയിരുത്തൽ. വ്യത്യസ്ത ജനിതക ശ്രേണിയിൽ പെട്ട രോഗാണു ആണിതെന്നാണ് വിദഗ്ദർ നൽകുന്ന വിശദീകരണം.രോഗം വന്നുപോയി മൂന്നു മാസത്തിനിടെ ആണ് രണ്ട് ആരോഗ്യ പ്രവർത്തകർക്ക് വീണ്ടും കൊവിഡ് ബാധിച്ചതായി സ്ഥിരീകരിച്ചത്. സിഎസ്ഐആറിനു കീഴിലുള്ള ഐഡിഐഡി ദില്ലിയിൽ നടത്തിയ പഠനത്തിലാണ് രോഗബാധ കണ്ടെത്തിയത്.
അതേസമയം, രാജ്യത്ത് കോവിഡ് രോഗ ബാധിതരുടെ എണ്ണം 50 ലക്ഷം കടന്നു. കഴിഞ്ഞ 24 മണിക്കൂറിനിടെ രാജ്യത്ത് 90,123 പേർക്കാണ് കോവിഡ് സ്ഥിരീകരിച്ചത്. ഇതോടെ രാജ്യത്തെ കോവിഡ് ബാധിതരുടെ എണ്ണം 50,20,360 ആയി.24 മണിക്കൂറിനിടെ 1,290 പേരാണ് കോവിഡ് ബാധിച്ച് മരിച്ചത്. ഇതോടെ രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 82,066 ആയി. കോവിഡ് ബാധിതരായിരുന്ന 39,42,361 പേർ ഇതുവരെ രോഗമുക്തി നേടി. 9,95,933 പേർ വിവിധ സംസ്ഥാനങ്ങളിലായി ഇപ്പോഴും ചികിത്സയിലാണ്.
മഹാരാഷ്ട്ര, ആന്ധ്രാപ്രദേശ്, തമിഴ്നാട്, കർണാടക, ഉത്തർപ്രദേശ്, എന്നീ സംസ്ഥാനങ്ങളാണ് രാജ്യത്തെ കോവിഡ് ബാധിതരുടെ എണ്ണത്തിൽ മുന്നിലുള്ളത്.