ഉദ്ദവ് താക്കറയുടെ കാർട്ടൂൺ വാട്ട്സ്ആപ്പ് ഗ്രൂപ്പിൽ പങ്കുവച്ചതിന് റിട്ട. നാവിക ഉദ്യോഗസ്ഥന് ശിവസേന പ്രവർത്തകരുടെ ക്രൂരമർദ്ദനം
മുംബൈ: മഹാരാഷ്ട്ര മുഖ്യമന്ത്രി ഉദ്ധവ് താക്കറയുടെ കാര്‍ട്ടൂണ്‍ വാട്ട്സ്ആപ്പ് ഗ്രൂപ്പിൽ പങ്കുവച്ചതിന് റിട്ടയേർഡ് നാവിക സേന ഉദ്യോഗസ്ഥനെ ശിവസേന പ്രവര്‍ത്തകര്‍ ക്രൂരമായി മര്‍ദ്ദിച്ചതായി പരാതി. മദന്‍ ശര്‍മ(65) എന്നയാള്‍ക്കാണ് ക്രൂരമായി മര്‍ദ്ദനമേറ്റത്. സബര്‍ബന്‍ കാണ്ഡിവാലിയിലെ ലോഖണ്ഡ്യാല കോംപ്ലക്‌സിലുള്ള ഇയാളുടെ താമസസ്ഥലത്തെത്തിയാണ് ശിവസേന പ്രവര്‍ത്തകര്‍ മര്‍ദ്ദിച്ചത്. മർദ്ദനത്തിന്റെ സിസിടിവി ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിച്ചിരുന്നു.ഇതിനിടെ, സംഭവത്തില്‍ പ്രതിഷേധവുമായി മുന്‍ മുഖ്യമന്ത്രി ദേവേന്ദ്ര ഫഡ്‌നാവിസ് ഉള്‍പ്പടെയുള്ളവര്‍ രംഗത്തെത്തിയിട്ടുണ്ട്.
