സാങ്കേതിക തകരാറിൽ വിമാനത്തെ സാഹസികമായി മൂക്കുകുത്തിച്ച് പൈലറ്റ് നിലത്തിറക്കി
യാംഗൂണ്: ക്യാപ്റ്റന് മിയാത് മോയ് ഓങ് എന്ന പൈലറ്റിന്റെ സമയോചിതമായ ഇടപെടല് വിമാനത്തിലെ വന് ദുരന്തം ഒഴിവാക്കി . സാങ്കേതിക തകരാറിനെ തുടര്ന്ന് യാംഗൂണില്നിന്ന് മാന്ഡലയ് വിമാനത്താവളത്തിലേക്ക് എത്തിയ മ്യാന്മര് നാഷനല് എയര്ലൈന്സിന്റെ എംബ്രയര് 190 വിമാനം മൂക്കുത്തിച്ച് പൈലറ്റ് നിലത്തിറക്കി . 89 യാത്രക്കാരായിരുന്നു വിമാനത്തിലുണ്ടായിരുന്നത്.
റണ്വേയിലേക്ക് ഇറങ്ങുന്നതിനു തൊട്ടുമുന്പാണ് വിമാനത്തിന്റെ മുന്നിലെ ചക്രങ്ങള് പ്രവര്ത്തനരഹിതമാണെന്നു പൈലറ്റ് തിരിച്ചറിയുന്നത്. ഉടന് തന്നെ പൈലറ്റ് അടിയന്തര ലാന്ഡിംഗിന് അറിയിപ്പു നല്കി. ശേഷം അധിക ഇന്ധനം പുറത്തേക്കു തള്ളി വിമാനത്തിന്റെ ഭാരം കുറച്ച് ലാന്ഡിംഗ് നടത്തുകയായിരുന്നു. വിമാനം റണ്വേയില്നിന്ന് അല്പം തെന്നി മാറിയെങ്കിലും സുരക്ഷിതമായി യാത്രക്കാരെ പുറത്തിറക്കാന് കഴിഞ്ഞു. ക്യാപ്റ്റന് മിയാത് മൊയ് ഒംഗിന്റെ സാഹസികമായ ധൈര്യമാണ് യാത്രക്കാരുടെ ജീവന് രക്ഷിച്ചത്.