ഡൽഹിക്കെതിരെ കൊൽക്കത്തയ്ക്ക് 71 റണ്സ് ജയം
കൊൽക്കത്ത: ഡൽഹി ഡെയർ ഡെവിൾസിനെതിരേ കൊൽക്കത്ത നൈറ്റ് റൈഡേഴ്സിനു കൂറ്റൻ വിജയം. 71 റണ്സിനാണ് കെകെആർ ഡെവിൾസിനെ തുരത്തിയത്. വെസ്റ്റ് ഇൻഡീസ് ബാറ്റ്സ്മാൻ ആന്ദ്രെ റസൽ ബാറ്റിംഗിൽ തിളങ്ങിയപ്പോൾ മറ്റൊരു വിൻഡീസ് താരം സുനിൽ നരെയ്ൻ ബൗളിംഗിൽ ഡൽഹിയുടെ നടുവൊടിച്ചു. ആദ്യം ബാറ്റു ചെയ്ത കെകെആർ ഉയർത്തിയ 201 റണ്സ് വിജയലക്ഷ്യം പിന്തുടർന്ന ഡൽഹി 14.2 ഓവറിൽ 129 റണ്സിന് എല്ലാവരും പുറത്തായി. ഗ്ലെൻ മാക്സ്വെൽ(22 പന്തിൽ 47), റിഷഭ് പന്ത്(26 പന്തിൽ 43) എന്നിവർക്കൊഴികെ മറ്റാർക്കും ഡൽഹി നിരയിൽ രണ്ടക്കം കടക്കാൻ കഴിഞ്ഞില്ല.
ടോസ് നഷ്ടപ്പെട്ട് ബാറ്റിംഗിനിറങ്ങിയ കെകെആറിന് തുടക്കത്തിൽത്തന്നെ സുനിൽ നരെയ്നെ(1) നഷ്ടപ്പെട്ടു. ട്രെന്റ് ബോൾട്ടിനായിരുന്നു വിക്കറ്റ്. രണ്ടാം വിക്കറ്റിൽ ഒത്തു ചേർന്ന റോബിൻ ഉത്തപ്പ-ക്രിസ് ലിൻ സഖ്യം സ്കോർ ബോർഡിൽ 55 റണ്സ് കൂട്ടിച്ചേർത്തു. 35 റണ്സ് നേടി ഉത്തപ്പ പുറത്തായതിനു പിന്നാലെ 29 പന്തിൽ 31 റണ്സുമായി ലിന്നും മടങ്ങി. മികച്ച ഷോട്ടുകളുമായി തുടങ്ങിയെങ്കിലും നായകൻ ദിനേശ് കാർത്തിക്കിനും മുന്നോട്ടുപോകാൻ കഴിഞ്ഞില്ല. 10 പന്തിൽ 19 റണ്സായിരുന്നു കാർത്തിക്കിന് നേടാനായത്.