സർക്കാർ ഉദ്യോഗസ്ഥനെ ചെരുപ്പൂരി അടിച്ച് ബിജെപി വനിതാ നേതാവ്..; വീഡിയോ
ചണ്ഡീഗഡ്: ബിജെപി നേതാവും ടിക് ടോക് താരവുമായ സോനാലി ഫോഗാട്ട് സർക്കാർ ഉദ്യോഗസ്ഥനെ ചെരുപ്പൂരി അടിക്കുന്ന വീഡിയോ സമൂഹമാധ്യമങ്ങളിൽ വൈറലാകുന്നത്.
ഹരിയാനയിലെ അഡാംപൂര്‍ മാർക്കറ്റിലെ ഉദ്യോഗസ്ഥനായ സുൽത്താൻ സിംഗിനെയാണ് സോനാലി മർദ്ദിച്ചത്. സോനാലി ഫോഗാട്ട് കാര്‍ഷിക വിപണി പരിശോധിക്കുന്നതിനിടെ ആയിരുന്നു സംഭവം.കാര്‍ഷികോല്‍പാദന മാര്‍ക്കറ്റ് കമ്മിറ്റി അംഗമായ സുല്‍ത്താന്‍ സിംഗിനെതിരെ കര്‍ഷകര്‍ നല്‍കിയ പരാതിയുടെ അടിസ്ഥാനത്തില്‍ പരിശോധനയ്ക്ക് എത്തിയതായിരുന്നു സോനാലി.
ഇതിനിടെ ആക്ഷേപകരമായ അഭിപ്രായം പറഞ്ഞെന്ന് ആരോപിച്ചാണ് സോനാലി ഇയാളെ മർദ്ദിച്ചതെന്നാണ് റിപ്പോർട്ടുകൾ. ബഞ്ചിലിരിക്കുന്ന ഉദ്യോഗസ്ഥനെ സോനാലി ആവർത്തിച്ച് മർദ്ദിക്കുന്നത് വിഡിയോയിൽ കാണാം. പരാതികള്‍ ശ്രദ്ധയില്‍പെട്ടിട്ടുണ്ടെന്നും പരിഹരിക്കുമെന്നും പറഞ്ഞ് ഉദ്യോഗസ്ഥന്‍ സോനാലിയോട് അപേക്ഷിക്കുന്നുമുണ്ട്.
നിരവധി പേര്‍ നോക്കിനില്‍ക്കെയാണ് സോനാലി ഇയാളെ ചെരിപ്പൂരി തല്ലിയത്. പിന്നാലെ സോനാലി പൊലീസിനെ വിളിച്ചുവരുത്തുകയും സിംഗിനെതിരെ പരാതി നൽകുകയും ചെയ്തു. അതേസമയം, സോനാലിക്കെതിരെ നടപടിയെടുക്കണമെന്ന് ആവശ്യപ്പെട്ട് കോൺഗ്രസ് നേതാവ് രണ്‍ദീപ് സിംഗ് സുര്‍ജേവാല രംഗത്തെത്തി.