ആനയുടെ ചവിട്ടേറ്റ് പാപ്പാന് ഗുരുതര പരിക്ക്
കൊല്ലം: ആനയുടെ ചവിട്ടേറ്റ് പാപ്പാന് ഗുരുതര പരിക്ക്. കോതമംഗലം സ്വദേശി ജോബിനാണ് (കുഞ്ഞുമോൻ) പരിക്കേറ്റത്. ഇയാളെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പാരിപ്പള്ളി കൊടിമൂട്ടിൽ ക്ഷേത്രത്തിലെ ഗജമേളയ്ക്കായി കൊണ്ടുവന്ന ആനയാണ് പാപ്പാനെ ആക്രമിച്ചത്.
ഞായറാഴ്ച രാത്രി 7.30ഓടെയായിരുന്നു സംഭവം. ഗജമേളയ്ക്ക് ആനകളെ അണിനിരത്തുന്നതിന് മുമ്പ് എലിഫന്റ് സ്ക്വാഡ് നടത്തിയ പരിശോധനയിൽ ഒരു ആനയ്ക്ക് മദപ്പാടിന്റെ ലക്ഷണം കണ്ടതിനെ തുടർന്ന് മാറ്റി നിർത്തി. ഗജമേളയ്ക്കുശേഷം മറ്റ് ആനകൾ ഉത്സവ പറമ്പ് വിട്ട് പോവുകയും ചെയ്തു.
സമീപത്തെ പറമ്പിൽ കെട്ടിയിരുന്ന മദപ്പാടുള്ള ആന അടുത്തുണ്ടായിരുന്ന ജേക്കബിനെ ചവിട്ടുകയായിരുന്നു. പരിക്കേറ്റ ഇയാളെ പോലീസും നാട്ടുകാരും ചേർന്ന് ആദ്യം പാരിപ്പള്ളി മെഡിക്കൽ കോളജ് ആശുപത്രിയിലും പിന്നീട് തിരുവനന്തപുരം മെഡിക്കൽ കോളജിലും പ്രവേശിപ്പിച്ചു.