രമ്യാകൃഷ്ണന്‍ ശേഷം വീണ്ടും മലയാള സിനിമയിലേക്ക്
ചെറിയൊരു ഇടവേളക്കു ശേഷം രമ്യാകൃഷ്ണന്‍ ശേഷം വീണ്ടും മലയാള സിനിമയിലേക്ക്. മോഹന്‍ലാലിനെ നായകനാക്കി ഭദ്രന്‍ ഒരുക്കുന്ന ചിത്രത്തിലാണ് രമ്യാ കൃഷ്ണന്‍ നായികയായി എത്തുന്നത്. ചിത്രത്തില്‍ മറ്റു രണ്ട് ശക്തമായ കഥാപാത്രങ്ങളായി ശരത് കുമാറും സിദ്ദീഖും എത്തുന്നുണ്ട്. ബിഗ് ബജറ്റിലുള്ള ആക്ഷന്‍ മൂവിയായിരിക്കും ഇതെന്നാണ് അറിയുന്നത്.
നീണ്ടനാളത്തെ ഇടവേളക്കു ശേഷമാണ് മോഹന്‍ലാലും രമ്യാകൃഷ്ണനും ഒന്നിച്ചെത്തുന്നത്. ആര്യനാണ് ഇരുവരും ഒന്നിച്ചെത്തിയ അവസാന ചിത്രം. നേരം പുലരുമ്പോള്‍, അനുരാഗി, ഓര്‍ക്കാപ്പുറത്ത്, ആര്യന്‍ എന്നിവയാണ് ലാല്‍ രമ്യ കൂട്ടുകെട്ടില്‍ ഇറങ്ങിയിട്ടുള്ളത്.
ക്രിസ്ത്യന്‍ ബ്രദേഴ്‌സിനു ശേഷം ശരത്കുമാര്‍ ലാലിനൊപ്പം അഭിനയിക്കുന്നുവെന്ന പ്രത്യേകതയുമുണ്ട്. ഏപ്രില്‍ അവസാനത്തോടെ ഭദ്രന്‍ സിനിമയുടെ ചിത്രീകരണം ആരംഭിക്കുമെന്നാണ് അറിയുന്നത്. കായംകുളം കൊച്ചുണ്ണിയും ഒടിയനും പൂര്‍ത്തിയാക്കിയ ശേഷം മോഹന്‍ലാല്‍ ഭദ്രന്‍ ചിത്രത്തില്‍ ജോയിന്‍ ചെയ്യുമെന്നാണ് അറിയുന്നത്.
