അമേരിക്കയെ വരിഞ്ഞു മുറുക്കി കോവിഡ് 19: രോഗ ബാധിതരുടെ എണ്ണത്തിൽ ഒന്നാമത്; 24 മണിക്കൂറിനിടെ രോഗം സ്ഥിരീകരിച്ചത് 16,000 പേര്ക്ക്
വാഷിംഗ്ടൺ: കോവിഡ് 19 മരണതാണ്ഡവം തുടരുകയാണ്, ആഗോളതലത്തിൽ മരണ സംഖ്യ 24000 കടന്നു കഴിഞ്ഞു. രോഗ ബാധിതരുടെ എണ്ണം അഞ്ചരലക്ഷത്തിലേക്ക് അടുക്കുകയാണ്. അതേസമയം, രോഗം പൊട്ടിപ്പുറപ്പെട്ട ചൈനയെയും വൈറസ് ബാധ വിറപ്പിച്ച ഇറ്റലിയെയും ഒക്കെ പിന്തള്ളി രോഗ ബാധിതരുടെ എണ്ണത്തിൽ ഒന്നാമത് എത്തിയിരിക്കുകയാണ് അമേരിക്ക. 85,377 കേസുകളാണ് അമേരിക്കയിൽ ഇതുവരെ റിപ്പോർട്ട് ചെയ്തത്. വൈറസിന്റെ പ്രഭവ കേന്ദ്രമായ ചൈനയിൽ 81,340 രോഗികളാണുള്ളത്.കഴിഞ്ഞ 24 മണിക്കൂറിനിടെ അമേരിക്കയിൽ 16,841 പുതിയ കേസുകളാണ് റിപ്പോർട്ട് ചെയ്തത്. രാജ്യത്ത് ഇതുവരെ 1,295 പേർ വൈറസ് ബാധിച്ച് മരിച്ചു. ന്യൂയോർക്കിലാണ് ഏറ്റവും കൂടുതൽ പേർ മരിച്ചത്. ഇതുവരെ 466 പേരാണ് മരിച്ചത്. വാഷിംഗ്ടണിൽ 147 പേരും മരിച്ചു.