സുരക്ഷ ഉറപ്പു നല്കിയാല് പീഡനങ്ങള് തുറന്നു പറയാമെന്നു ബോളിവുഡ് നടി
മുംബൈ: ആർക്കെങ്കിലും തന്റെ സുരക്ഷ ഉറപ്പുനൽകാൻ കഴിയുമെങ്കിൽ സിനിമാ മേഖലയിൽ താൻ നേരിട്ട ലൈംഗിക പീഡനങ്ങളെ സംബന്ധിച്ചു തുറന്നുപറയാൻ തയാറാണെന്ന് ബോളിവുഡ് നടിയും മോഡലുമായ റിച്ച ഛദ്ദ. ഇത്തരത്തിൽ സുരക്ഷയൊരുക്കുമെങ്കിൽ താൻ മാത്രമല്ല, ആയിരക്കണക്കിനുപേർ തുറന്നുപറച്ചിലുകൾ നടത്തുമെന്നും പിടിഐക്കു നൽകിയ അഭിമുഖത്തിൽ നടി പറഞ്ഞു.
നിങ്ങൾ എനിക്കു ജീവിതകാലം മുഴുവൻ പെൻഷൻ തന്നാൽ, എന്റെയും കുടുംബത്തിന്റെയും സുരക്ഷ ഉറപ്പുനൽകിയാൽ, ടിവിയിലും സിനിമയിലും എനിക്ക് തുടരാൻ കഴിയുമെങ്കിൽ, എന്റെ കരിയർ തടസമില്ലാതെ പോകുമെങ്കിൽ പേരുകൾ തുറന്നുപറയാനും ചിലരെ നാണംകെടുത്താനും ഞാൻ തയാറാണ്- റിച്ച പറഞ്ഞു. എന്നാൽ ആരു തനിക്കു സുരക്ഷ ഒരുക്കുമെന്ന ചോദ്യവും നടി ഉന്നയിക്കുന്നു. ഇരകൾക്കു സുരക്ഷ ഒരുക്കുന്നതിനുള്ള പരിസ്ഥിതി സിനിമാ മേഖലയ്ക്കും സമൂഹത്തിനും നഷ്ടമായെന്നും നടി കൂട്ടിച്ചേർത്തു.