പത്മാവതി റിലീസ് തീയതി മാറ്റി, പുതുക്കിയ തീയതി പിന്നീട്
മുംബൈ: സഞ്ജയ് ലീല ബൻസാലിയുടെ വിവാദ ചിത്രം പത്മാവതിയുടെ റിലീസ് തീയതി മാറ്റി. ഡിസംബർ ഒന്നിനാണ് റിലീസ് നിശ്ചയിച്ചിരുന്നത്. പുതുക്കിയ തീയതി പിന്നീട് അറിയിക്കുമെന്ന് അണിയറ പ്രവർത്തകർ അറിയിച്ചു. പ്രതിഷേധക്കാരുമായി ചർച്ച നടത്തിയ ശേഷം പുതുക്കിയ തീയതി പ്രഖ്യാപിക്കുമെന്നാണു സൂചന.
അപേക്ഷ പൂർണമായിരുന്നില്ലെന്ന കാരണം ചൂണ്ടിക്കാട്ടി സെൻസറിംഗിന് അയച്ച പദ്മാവതി പ്രിന്റ് സർട്ടിഫിക്കേഷൻ ബോർഡ് തിരിച്ചയച്ചിരുന്നു. കഴിഞ്ഞ വെള്ളിയാഴ്ചയാണ് ചിത്രം സെൻസർ ബോർഡിനു സമർപ്പിച്ചത്. ബോർഡ് ചട്ടങ്ങളനുസരിച്ച് 61 ദിവസത്തിനുള്ളിൽ ചിത്രങ്ങൾ സെൻസർ ചെയ്തു നൽകിയാൽ മതി. സെൻസർ ബോർഡ് സെൻസറിംഗ് പൂർത്തിയാക്കി ചിത്രം കൈമാറില്ലെന്ന ധാരണയെ തുടർന്നാണ് റിലീസ് നീളുന്നതെന്നാണു സൂചന.