മുംബൈയിൽ ഏഴു കോടിയുടെ വിദേശനിർമിത സിഗരറ്റുകൾ പിടികൂടി
മുംബൈ: മുംബൈയിൽ നികുതി വെട്ടിച്ച് ഇറക്കുമതി ചെയ്ത 6.92 കോടിയുടെ വിദേശനിർമിത സിഗരറ്റ് പിടികൂടി. ഇന്തോനേഷ്യൻ നിർമിതമായ ഗുദാംഗ് ഗരം എന്ന സിഗരറ്റാണ് പിടിച്ചെടുത്തത്.
ഭീവൻഡിയിലെ ഒരു ഫ്ളാറ്റിൽ ഡയറക്ടറേറ്റ് ഓഫ് റവന്യൂ ഇന്റലിജൻസ്(ഡിആർഐ) നടത്തിയ റെയ്ഡിലാണ് ഇവ പിടിച്ചെടുത്തത്. പശ്ചിമേഷ്യൻ രാജ്യങ്ങളിൽ വിൽക്കുന്നതിനായി ഇന്തോനേഷ്യയിൽ നിർമിച്ചവയാണ് ഈ സിഗരറ്റുകളെന്ന് ഡിആർഐ പത്രക്കുറിപ്പിൽ അറിയിച്ചു.
സിഗരറ്റ് ഇന്ത്യയിലേക്ക് ഇറക്കുമതി ചെയ്ത ആളെ തിരിച്ചറിഞ്ഞിട്ടുണ്ടെന്നും ഇയാൾക്കായി തെരച്ചിൽ തുടരുകയാണെന്നും പോലീസ് അറിയിച്ചു.