മലയാളി ഉംറ തീര്ഥാടകര് യാത്ര ചെയ്ത ബസിനു പിറകില് ട്രെയിലര് ഇടിച്ച് പാക് പൗരന് മരിച്ചു
ത്വാഇഫ്:മലയാളി ഉംറ തീര്ഥാടകര് യാത്ര ചെയ്ത ബസിനു പിറകില് ട്രെയിലര് ഇടിച്ച് ട്രെയിലര് ഡ്രൈവറായ പാക് പൗരന് മരിച്ചു. പത്തിലേറെ മലയാളി തീര്ഥാടകര്ക്ക് പരിക്കേറ്റു. ശനിയാഴ്ച വൈകീട്ട് ത്വാഇഫ്- റിയാദ് അതിവേഗ പാതയില് അല്മോയക്ക് സമീപമാണ് അപകടം .പരിക്കേറ്റ വരെ ഉടന് അല്മോയ ജനറല് ആശുപത്രിയില് പ്രവേശിപ്പിച്ചു. ഗുരുതരമായി പരിക്കേറ്റ രണ്ടുപേരെ വിദഗ്ധ ചികിത്സക്കായി ത്വാഇഫ് ആശുപത്രിയിലേക്ക് മാറ്റി.
ദമ്മാമില് നിന്ന് പുറപ്പെട്ട തീര്ഥാടക സംഘം മദീന സന്ദര്ശനം കഴിഞ്ഞ് ഉംറ നിര്വഹിച്ച ശേഷം തിരിച്ച് ദമ്മാമിലേക്കുള്ള യാത്രാമധ്യേയാണ് അപകടം സംഭവിച്ചത്. വിശ്രമത്തിനായി റോഡിന്റെ വശത്ത് ബസ് നിര്ത്തിയിട്ട സമയത്താണ് ട്രെയിലര് പിന്നില് ഇടിച്ചത്. ഇടിയുടെ ആഘാതത്തില് ട്രെയിലര് പൂര്ണമായും തകര്ന്നു.