പോര്ഷെയുടെ ഇലക്ട്രിക് സ്പോര്ട്സ് കാറായ ടൈകനിന്റെ പുതിയ ബേസ് വേരിയന്റ് ടൈകന് 4 S അവതരിപ്പിച്ചു
ജര്മന് ആഡംബര വാഹന നിര്മാതാക്കളായ പോര്ഷെയുടെ ഇലക്ട്രിക് സ്പോര്ട്സ് കാറായ ടൈകനിന്റെ പുതിയ ബേസ് വേരിയന്റ് ടൈകന് 4 S അവതരിപ്പിച്ചു. അടുത്തിടെ പുറത്തിറങ്ങിയ ടൈകന് ടര്ബോ, ടൈകന് ടര്ബോ എസ് എന്നിവയ്ക്ക് പിന്നാലെയെത്തുന്ന മൂന്നാമത്തെ ടൈകന് വകഭേദമാണിത്.
79.2kWh (പെര്ഫോമെന്സ് ബാറ്ററി), 93.4 kWh (പെര്ഫോമെന്സ് ബാറ്ററി പ്ലസ്) എന്നീ രണ്ട് ബാറ്ററി പാക്ക് ഓപ്ഷനില് ടൈകന് 4 S ലഭ്യമാകും. യഥാക്രമം 530 എച്ച്പി, 571 എച്ച്പി കരുത്തേകുന്നതാണ് ഇവ. മുന്നിലും പിന്നിലുമായാണ് ഇതിലെ രണ്ട് ഇലക്ട്രിക് മോട്ടോറിന്റ സ്ഥാനം. 800V ഡിസി ഫാസ്റ്റ് ചാര്ജിങ് സംവിധാനവും ഇതിലുണ്ട്.4.0 സെക്കന്ഡില് ടൈകന് 4S പൂജ്യത്തില് നിന്ന് 100 കിലോമീറ്റര് വേഗം കൈവരിക്കും. പരമാവധി വേഗത മണിക്കൂറില് 250 കിലോമീറ്ററാണ്. പെര്ഫോമെന്സ് ബാറ്ററിയില് ഒറ്റചാര്ജില് 407 കിലോമീറ്ററും പെര്ഫോമെന്സ് ബാറ്ററി പ്ലസില് 463 കിലോമീറ്ററും സഞ്ചരിക്കാം.
രൂപത്തിലും മറ്റ് ഫീച്ചേഴ്സിലും ടൈകന് ടര്ബോ, ടര്ബോ എസ് മോഡലുകള്ക്ക് സമാനമാണ് ടൈകന് 4 S. ആദ്യ രണ്ട് മോഡലുകളെക്കാള് വില 4S പതിപ്പിന് കുറവായിരിക്കും. അടുത്ത വര്ഷത്തോടെ ടൈകന് ഇലക്ട്രിക് ഇന്ത്യന് വിപണിയിലേക്കുമെത്തും. പൂര്ണമായും നിര്മിച്ച് ഇറക്കുമതി വഴിയാണ് പോര്ഷെ ടൈകന് ഇങ്ങോട്ടെത്തുക.