ടെഹ്റാൻ: കാനഡ, മെക്സിക്കോ, അമേരിക്ക എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന 2026 ഫിഫ ലോകകപ്പ് ഫുട്ബോൾ മാമാങ്കത്തിന് കർട്ടൻ ഉയരാൻ രണ്ട് ദിവസങ്ങൾ മാത്രം ബാക്കിനിൽക്കെ, ഇറാൻ ഫുട്ബോൾ ഫെഡറേഷന്റെ ടിക്കറ്റ് വിഹിതം പൂർണ്ണമായും റദ്ദാക്കിയതായി അധികൃതർ വ്യക്തമാക്കി (Iran World Cup Tickets Cancelled). ഔദ്യോഗികമായി പ്രഖ്യാപിച്ച നടപടിക്രമങ്ങൾ പാലിച്ച് മാസങ്ങൾക്ക് മുമ്പ് തന്നെ ടിക്കറ്റുകൾ ബുക്ക് ചെയ്യുകയും യാത്രാ പദ്ധതികൾ പൂർത്തിയാക്കുകയും ചെയ്ത പതിനായിരക്കണക്കിന് ഇറാനിയൻ ഫുട്ബോൾ ആരാധകരെയും കാണികളെയും അതീവ പ്രതിസന്ധിയിലാക്കുന്നതാണ് ഈ അപ്രതീക്ഷിത നടപടി. കടുത്ത രാഷ്ട്രീയ-നയതന്ത്ര തർക്കങ്ങളും പശ്ചിമേഷ്യയിലെ നിലവിലെ യുദ്ധസമാനമായ സാഹചര്യങ്ങളുമാണ് ഇറാന്റെ ഫാൻസ് ടിക്കറ്റുകൾ അവസാന നിമിഷം പിൻവലിക്കാൻ കാരണമായതെന്നാണ് സൂചന. ജൂൺ 11-ന് മെക്സിക്കോ സിറ്റിയിൽ വെച്ച് നടക്കുന്ന മെക്സിക്കോ-സൗത്ത് ആഫ്രിക്ക ഉദ്ഘാടന മത്സരത്തോടെയാണ് 48 ടീമുകൾ മാറ്റുരയ്ക്കുന്ന ചരിത്രത്തിലെ ഏറ്റവും വലിയ ലോകകപ്പ് പോരാട്ടങ്ങൾക്ക് തുടക്കമാകുന്നത്.
ഇറാൻ ദേശീയ ടീം ഇതിനകം തന്നെ തങ്ങളുടെ ആദ്യ മത്സരങ്ങൾക്കായി മെക്സിക്കോയിലെ തിഹുവാന അന്താരാഷ്ട്ര വിമാനത്താവളത്തിൽ എത്തിച്ചേർന്നിട്ടുണ്ട്. ജൂൺ 15-ന് ലോസ് ഏഞ്ചൽസിലെ സോഫി സ്റ്റേഡിയത്തിൽ വെച്ച് ന്യൂസിലാൻഡിനെതിരെയാണ് ഗ്രൂപ്പ് ജി-യിലെ ഇറാന്റെ ആദ്യ പോരാട്ടം നിശ്ചയിച്ചിരിക്കുന്നത്. എന്നാൽ ടിക്കറ്റുകൾ കൂട്ടത്തോടെ റദ്ദാക്കപ്പെട്ടതോടെ വിദേശ രാജ്യങ്ങളിൽ എത്തിയ ആരാധകർക്ക് സ്റ്റേഡിയത്തിൽ പ്രവേശിച്ച് തങ്ങളുടെ പ്രിയപ്പെട്ട ടീമിനെ പിന്തുണയ്ക്കാൻ സാധിക്കാത്ത അവസ്ഥയാണുള്ളത്. മുൻകൂട്ടി പ്രഖ്യാപിച്ച അന്താരാഷ്ട്ര മാനദണ്ഡങ്ങൾ ലംഘിച്ചുകൊണ്ട് ഫിഫയും പ്രാദേശിക ഓർഗനൈസിംഗ് കമ്മിറ്റിയും കൈക്കൊണ്ട ഈ ഏകപക്ഷീയമായ തീരുമാനത്തിനെതിരെ കടുത്ത പ്രതിഷേധവുമായി ഇറാൻ ഫുട്ബോൾ ഫെഡറേഷൻ രംഗത്തെത്തിയിട്ടുണ്ട്. വിമാന ടിക്കറ്റും ഹോട്ടൽ ബുക്കിംഗും ഉൾപ്പെടെ വലിയ തുക ചിലവഴിച്ച തങ്ങളുടെ പൗരന്മാർക്ക് നീതി ലഭ്യമാക്കണമെന്നും, ടിക്കറ്റ് വിതരണം അടിയന്തിരമായി പുനഃസ്ഥാപിക്കണമെന്നും ആവശ്യപ്പെട്ട് ഇറാൻ ഫിഫയ്ക്ക് ഔദ്യോഗികമായി പരാതി നൽകിയിട്ടുണ്ട്.
Summary: Just days before the historic 2026 FIFA World Cup kicks off in North America, the Football Federation of the Islamic Republic of Iran (FFIRI) announced on Tuesday that its official spectator ticket allocation has been abruptly withdrawn. The sudden cancellation leaves thousands of passionate Iranian football fans, who had already finalized extensive travel, hotel, and transit logistics, completely unable to enter venues to support their national squad.
