ന്യൂഡൽഹി: പ്രധാനമന്ത്രി ഉജ്ജ്വല യോജന ഗുണഭോക്താക്കൾക്ക് വർഷത്തിൽ ലഭിക്കുന്ന സബ്സിഡി നിരക്കിലുള്ള പാചകവാതക സിലിണ്ടറുകളുടെ എണ്ണം കേന്ദ്ര സർക്കാർ ഒമ്പതിൽ നിന്ന് നാലായി കുറച്ചു. ഗാർഹിക ഉപഭോഗത്തിന്റെ ശരാശരി കണക്കുകൾ അടിസ്ഥാനമാക്കിയാണ് ഈ തീരുമാനമെന്ന് പെട്രോളിയം പ്രകൃതിവാതക മന്ത്രാലയത്തിലെ അഡീഷണൽ സെക്രട്ടറി പ്രവീൺ മൽ ഖാനൂജ അറിയിച്ചു.(Ujjwala scheme, Central Govt Reduces Subsidised LPG Cylinders To Four)
2016-ൽ പദ്ധതി ആരംഭിച്ചപ്പോൾ വർഷത്തിൽ 12 സബ്സിഡി സിലിണ്ടറുകളാണ് ലഭിച്ചിരുന്നത്. കഴിഞ്ഞ വർഷം ഇത് ഒമ്പതായി കുറച്ചിരുന്നു. ഇപ്പോൾ ഇത് നാലായി വീണ്ടും വെട്ടിക്കുറയ്ക്കുകയായിരുന്നു. 2022 മെയ് മാസം മുതൽ സിലിണ്ടർ ഒന്നിന് 200 രൂപ സബ്സിഡി നൽകിയിരുന്നെങ്കിലും, 2023 ഒക്ടോബറിൽ ഇത് 300 രൂപയായി ഉയർത്തിയിരുന്നു.
കഴിഞ്ഞ മൂന്ന് മാസത്തിനിടെ ഡൽഹിയിൽ പാചകവാതക വിലയിൽ 89 രൂപയുടെ വർദ്ധനവാണ് ഉണ്ടായത്. ജൂൺ 7-ന് സിലിണ്ടർ ഒന്നിന് 29 രൂപ കൂടി വർദ്ധിപ്പിച്ചു. നിലവിൽ സബ്സിഡി കിഴിച്ചാൽ ഉജ്ജ്വല ഗുണഭോക്താക്കൾ 642 രൂപ നൽകണം. അന്താരാഷ്ട്ര വിപണിയിൽ എൽപിജി വിലയിലുണ്ടായ കുതിച്ചുചാട്ടമാണ് ആഭ്യന്തര വില വർദ്ധനവിന് കാരണമെന്ന് സർക്കാർ വിശദീകരിക്കുന്നു. മിഡിൽ ഈസ്റ്റിലെ സംഘർഷങ്ങളെത്തുടർന്ന് എൽപിജി വിതരണത്തിൽ തടസ്സമുണ്ടായതാണ് വില ഉയരാൻ കാരണം.
ഒരു സിലിണ്ടർ വിൽക്കുമ്പോൾ എണ്ണ വിപണന കമ്പനികൾക്ക് ഏകദേശം 700 രൂപ വരെ നഷ്ടം നേരിടുന്നുണ്ടെന്ന് അധികൃതർ വ്യക്തമാക്കി. പെട്രോളിന് ലിറ്ററിന് 6 രൂപയും ഡീസലിന് 30 രൂപയുമാണ് നിലവിൽ കമ്പനികൾക്ക് നഷ്ടം. ഉയർന്ന വിലയിലും ആഗോളതലത്തിൽ ഏറ്റവും കുറഞ്ഞ നിരക്കിലാണ് ഇന്ത്യൻ കുടുംബങ്ങൾക്ക് പാചകവാതകം ലഭിക്കുന്നതെന്ന് സർക്കാർ അവകാശപ്പെടുന്നു. 2022 മുതൽ ഏകദേശം 52,000 കോടി രൂപയാണ് എൽപിജി സബ്സിഡിക്കായി സർക്കാർ ചെലവഴിച്ചത്.
Story Summary
The Centre has reduced the annual quota of subsidised LPG cylinders for Ujjwala scheme beneficiaries from nine to four, aligning it with average household consumption. Government officials cited the rising global LPG prices, which have significantly increased the supply cost, as the primary reason behind this reduction and the recent retail price hikes.
