ചാന്ദ്രയാത്രയില്‍ കൂട്ടിനായി പെണ്സുഹൃത്തിനെ വേണം; പ്രായം ഇരുപതോ അതിൽ കൂടുതലോ; ജപ്പാനിലെ കോടീശ്വരന്റെ പരസ്യം കണ്ടു ഞെട്ടി ലോകം
ചാന്ദ്രയാത്രയില്‍ കൂട്ടിനായി പെണ്സുഹൃത്തിനെ തേടി ജപ്പാനിലെ ഒരു കോടീശ്വരന്‍. വ്യവസായ പ്രമുഖനും ഫാഷന്‍ കമ്പനിയായ സോസോയുടെ മുന്‍ മേധാവിയുമായ യുസാക്കു മെസാവയാണ് തന്റെ ചാന്ദ്രയാത്രയിൽ കൂട്ടിനായി പെണ്സുഹൃത്തിനെ തിരയുന്നത്. പെണ്സുഹൃത്തിനെ തേടി ഓണ്‍ലൈന്‍ പരസ്യം നല്‍കിയിരിക്കുകയാണ് ഇദ്ദേഹം. അവിവാഹിതയും മറ്റു പ്രണയബന്ധങ്ങളുമില്ലാത്ത ഇരുപത് വയസ്സോ അതില്‍ കൂടുതലോ പ്രായമുള്ളവര്‍ക്കാണ് അവസരം.
അപേക്ഷിക്കാനുള്ള അവസാന തീയതി ജനുവരി 17 ആണ് . അപേക്ഷകരുമായി ഡേറ്റിംഗ് ഒക്കെ കഴിഞ്ഞതിന് ശേഷം മാത്രമേ ഒരാളെ അദ്ദേഹം തിരഞ്ഞെടുക്കൂ. രണ്ട് പങ്കാളികളിലായി മൂന്ന് കുട്ടികളുള്ള യുസാക്കു അടുത്തിടെയാണ് ഒരു ജപ്പാനീസ് നടിയുമായുള്ള ബന്ധം വേര്‍പിരിഞ്ഞത്.ഇതിനുശേഷം പങ്കാളികളില്ലാതിരുന്ന തന്നെ ഏകാന്തത ഏറെ മടുപ്പിച്ചെന്നും അതിനാലാണ് ഈ തീരുമാനമെന്നും 44-കാരനായ അദ്ദേഹം നൽകിയ പരസ്യത്തില്‍ പറയുന്നു. 2023ലോ അതിനുശേഷമോ ആയിരിക്കും സ്പേസ്എക്സിന്റെ ബഹിരാകാശ യാത്രയില്‍ യുസാക്കുവും പങ്കാളിയാവുക.
തന്നോടൊപ്പം ഏതാനുംചില കലാകാരന്മാരെ യാത്രയ്ക്കൊപ്പം കൂട്ടാനും ഇദ്ദേഹത്തിന് പദ്ധതിയുണ്ട്. ആള് കോടീശ്വരനായതിനാലും ചന്ദ്രനിലേക്കുള്ള അസുലഭ യാത്ര ആയതിനാലും പെണ്‍കുട്ടികള്‍ ക്യൂ നില്‍ക്കുമെന്നുറപ്പാണ്.